नेपालगन्जमा एक वर्षमै इन्धन खर्च एक करोड

नेपालगन्ज उपमहानगरपालिकाले आर्थिक वर्ष २०८१/०८२ मा सवारीसाधन इन्धन र मर्मत शीर्षकमा मात्रै डेढ करोड रुपैयाँभन्दा बढी खर्च गरेको पाइएको छ। महालेखापरीक्षकको लेखापरीक्षण प्रतिवेदनले यी खर्चमा मितव्ययिता कायम गर्नुपर्ने आवश्यकता औंल्याएपछि सार्वजनिक स्रोतसाधनको प्रयोग र खर्च व्यवस्थापनबारे प्रश्न उठेको हो।

८५.९४ वर्ग किलोमिटर क्षेत्रफलमा फैलिएको नेपालगन्ज उपमहानगरपालिकाले सेवा प्रवाह, अनुगमन, प्रशासनिक कामकाज तथा जनप्रतिनिधि र कर्मचारीको आवतजावतका लागि विभिन्न सवारीसाधन प्रयोग गर्दै आएको छ। लेखापरीक्षण प्रतिवेदनअनुसार उपमहानगरपालिकाले आर्थिक वर्ष २०८१/०८२ मा इन्धनतर्फ ९९ लाख ९९ हजार ९ सय ९९ रुपैयाँ खर्च गरेको छ।