सम्झनाले जितेको संसार

त्यो दिन कति बजेको थियो, मलाई ठ्याक्कै सम्झना छैन। म सधैंझै आफ्नो कार्य क्षेत्रमा थिएँ तर त्यो आवाज सम्झन्छु। पहिले कतै टाढाबाट केही दगुर्दै आए जस्तो, त्यसपछि पृथ्वी नै हल्लिएर फुटेजस्तो, ठूलो मेघगर्जनसहित पानीको आवाज, फलाममा फलाम ठोक्किएर आएको भयङ्कर युद्धयन्त्र जस्तो आवाज र मानिसहरूको चिच्याहट अनि एकाएक अँध्यारो।

म सुरुङ्गभित्रै भाग्न खोजेँ तर कता भाग्ने? अगाडिबाट दगुर्दै आइरहेको हिलो। पछाडिबाट धकेल्दै आइरहेको हिलो। खुट्टासम्म हिलो, कम्मरसम्म हिलो। शरीरको पूरै आधा भाग भरिएको हिलो र आधा भागले फेरिरहेको लामोलामो सास।