मनास्लु पदमार्गमा बाढीको कहर, लार्केपास यात्रा अनिश्चित

गोरखा — मनास्लु संरक्षण क्षेत्रअन्तर्गत बूढीगण्डकी र थेराङ खोलामा आएको बाढीले पुल बगाएपछि मनास्लु पदमार्ग अवरुद्ध भएको छ। पदमार्गमा क्षति पुगेसँगै जिल्ला प्रशासन कार्यालय गोरखाले अर्को सूचना जारी नभएसम्म मनास्लु क्षेत्रको पदयात्रा र लार्केपास आवतजावतमा रोक लगाएको छ।

आइतबार बिहान उत्तरी गोरखाको चुमनुब्री गाउँपालिका–४ नाम्रुङ क्षेत्रमा आएको बाढीले दुईवटा पुल बगाएको सहायक प्रमुख जिल्ला अधिकारी नेत्रप्रसाद शर्माले जानकारी दिए। उनका अनुसार बाढीले दुईवटा लघुजलविद्युत् आयोजना समेत बगाएको छ।