आफ्नै साथीको हत्या गरी फरार रहेका महरा सात वर्षपछि पक्राउ

चितवनको खैरहनीमा सात वर्षअघि एक मजदुरको हत्या गरेर फरार रहेका अभियुक्तलाई प्रहरीले बाराबाट पक्राउ गरेको छ। जिल्ला प्रहरी कार्यालय चितवन र मातहतका प्रहरी टोलीको संयुक्त सक्रियतामा हत्या आरोपी पक्राउ परेका हुन्।

इलाका प्रहरी कार्यालय टाँडीका प्रमुख डीएसपी सुवास भट्टका अनुसार २०७६ चैत २३ गते साँझ खैरहनी–९ स्थित नेपाल ग्यास उद्योग गण्डकीको कम्पाउण्डभित्र मजदुर बस्ने कच्ची घरको कोठामा एक पुरुष मृत अवस्थामा फेला परेका थिए। मृतक बारा जिल्लाको साविक फेटा गाविस–४, हाल फेटा गाउँपालिका–३ निवासी ४६ वर्षीय सखिचन महरा रहेको प्रहरीले जनाएको छ।