रसुवागढी–तातोपानी नाका ठप्प हुँदा कोरलामा चाप : चाडपर्वमा बढ्दै महँगीको जोखिम

काठमाडौं । नेपालको दोस्रो ठूलो आयात साझेदारको रूपमा स्थापित देश चीन हो । कुल आयातमा चीनको हिस्सा करिब २०.२८ प्रतिशत छ ।

यही भदौ १० गतेको विनाशकारी बाढीले रसुवागढी नाका ध्वस्त बनाएको र भदौ १४ देखि तातोपानी नाका पनि अस्थायी रूपमा बन्द छ । चीनबाट हुने आयातका लागि मुस्ताङको कोरला नाका प्रयोग गर्नुपर्ने बाध्यता सिर्जना भएको छ । यो वैकल्पिक मार्ग प्रयोग गर्दा काठमाडौंसम्म सामान आइपुग्न अतिरिक्त सातदेखि १० दिन बढी समय लाग्नेछ । साविकको दुई लाख रुपैयाँ ढुवानी भाडा बढेर चार लाख रुपैयाँ पुग्दा लागत झन्डै दोब्बर भएको छ । चाडपर्वको मुख्य सिजनमा उपभोग्य मूल्यमा यसको प्रत्यक्ष र गम्भीर असर पर्ने व्यवसायी तथा भन्सार अधिकारीहरू बताउँछन् ।