ओली हटाउने पक्षमा गण्डकी एमाले

पोखरा । एमाले स्याङ्जा जिल्ला कमिटीका अध्यक्ष सूर्यप्रसाद गैह्रे (पारस) व्यक्ति केन्द्रित हुँदा पार्टीले गत चुनावमा ठूलो क्षति व्यहोरेको बताउँछन् । उनले भने, ‘निर्वाचनमा मत घट्नु र गण्डकीका विभिन्न क्षेत्रसहित देशभर ४९ स्थानमा जमानत जफत हुनु सामान्य विषय होइन । हामी नीति र विचारभन्दा सत्ताकेन्द्रित भयौं । पार्टीमा सामूहिकता हराएको छ र व्यक्ति–केन्द्रित हुँदा ठूलो क्षति भएको छ ।’

कुनै व्यक्तिलाई नेतृत्वमा टिकाइराख्न पटक पटक गरिएको विधान संशोधनबाटै गलत दिशा समातेको उनको तर्क छ । उनले पार्टी नेतृत्वमा ७० वर्षे उमेर हद र २ वर्षे कार्यकालको प्रावधान हटाउने निर्णय गलत भएको बताए । अब विशेष महाधिवेसन गरेर हालको संकट समाधान गर्नुपर्ने उनको सुझाव छ । ‘पार्टी सामुहिकतामा छैन । व्यक्ति केन्द्रीत भएर क्षति भएको छ । विशेष महाधिवेशन गरौं, छलफल गरौं,’ उनले भने ।