सेवा प्रवाहमा सहज अनुभूति

ठिक एक वर्षअघि नेपालगन्ज–१२ का रमेश थापा सवारीसाधनको कर तिर्न यातायात व्यवस्था कार्यालय पुगेका थिए। बिहानै कार्यालय पुगे पनि उनको काम साँझतिर मात्रै सकिएको थियो। कार्यालयको एउटा कोठाबाट अर्को कोठा धाउँदाधाउँदै हैरान भएका उनले अन्ततः काम लिन कार्यालय परिसरमै सक्रिय बिचौलियाको सहारा लिनुपरेको थियो। अतिरिक्त रकम तिरेको केही मिनेटमै काम भएपछि उनलाई लागेको थियो– सरकारी कार्यालयमा पैसा नतिरी वा चिनजानबिना काम हुँदैन।

ठ्याक्कै एक वर्षपछि उनी फेरि त्यही कार्यालयमा पुगे। यसपटक न कसैले ढोकामै रोकेर काम गराइदिन्छु भने न कर्मचारीले नै अनावश्यक दुःख दिए। ‘उही कार्यालय हो भनेर विश्वास गर्नै गाह्रो भयो’, थापाले भने, ‘पहिले काम बनाउन बिचौलिया खोज्नुपर्ने अवस्था थियो तर अहिले कर्मचारीले नै प्रक्रिया बुझाएर काम गरिदिए।’ थापाको यो अनुभव एउटा व्यक्तिको मात्रै कथा होइन, बाँकेका सरकारी कार्यालयमा कर्मचारीको कार्यशैलीमा देखिएको परिवर्तनको प्रतिनिधिमूलक चित्र हो।