पाँच दिन बित्दा पनि भेटिएनन् कर्णालीमा बेपत्ता यात्रु, तीन ठूला दुर्घटनाले सडक सुरक्षामा गम्भीर प्रश्न

काठमाडौँ । देशका विभिन्न जिल्लामा एक साताभित्र भएका तीनवटा ठूला सडक दुर्घटनाले नेपालको सडक सुरक्षा र सरकारी तयारीमाथि पुनः गम्भीर प्रश्न उठाएको छ। विशेषगरी दैलेखको कर्णाली राजमार्गमा भएको यात्रुवाहक फोर्स गाडी दुर्घटनामा बेपत्ता भएका यात्रुहरूको खोजी कार्य पाँच दिन बितिसक्दा पनि सफल हुन सकेको छैन।

असार १८ गते बिहान करिब ११:३० बजे सुर्खेतबाट कालीकोटतर्फ जाँदै गरेको क.प्र.०२–००१ ख १०५५ नम्बरको गाडी चामुण्डाबिन्द्रासैनी नगरपालिका–७ स्थित साँगेताडा क्षेत्रमा सडकबाट करिब ४०० मिटर तल कर्णाली नदीमा खसेको थियो। दुर्घटनामा एक जनाको मृत्यु भएको पुष्टि भइसकेको छ भने पारिवारिक स्रोतका अनुसार अझै पाँच जना यात्रु बेपत्ता छन्।