मेलम्चीको पानी बन्द, वैकल्पिक स्रोतबाट उपत्यकामा खानेपानी वितरण गरिँदै

काठमाडौं– मनसुन सक्रिय भएसँगै निरन्तर वर्षाका कारण मेलम्ची खानेपानी आयोजनाबाट काठमाडौं उपत्यकामा पानी पथान्तरण अस्थायी रूपमा रोकिएको छ । सम्भावित प्राकृतिक जोखिमलाई ध्यानमा राख्दै मेलम्ची खानेपानी विकास समितिले असार १९ गतेदेखि पानी पथान्तरण बन्द गर्ने निर्णय गरेपछि काठमाडौं उपत्यकाको खानेपानी आपूर्तिमा प्रत्यक्ष असर परेको छ ।

काठमाडौं उपत्यका खानेपानी लिमिटेड (केयूकेएल) ले जल तथा मौसम विज्ञान विभागको मौसम पूर्वानुमानका आधारमा यस वर्ष मनसुन अपेक्षाकृत बढी सक्रिय रहेको र मेलम्ची नदीमा पानीको बहाव, बाढी, पहिरो तथा लेदो (डेब्रिस फ्लो) को जोखिम बढेकाले आयोजनाको संरचना सुरक्षित राख्न अस्थायी रूपमा पानी पथान्तरण रोकिएको जनाएको छ ।