प्रशान्त महासागरमा चीनद्वारा क्षेप्यास्त्र परीक्षण

बेइजिङ । चीनले सोमबार आणविक पनडुब्बीबाट प्रशान्त महासागरतर्फ एउटा क्षेप्यास्त्र परीक्षण गरेको छ । चीनको यो कदमप्रति छिमेकी मुलुकहरू जापान, अस्ट्रेलिया र न्युजिल्यान्डले गम्भीर चिन्ता व्यक्त गरेका छन् ।

चीनको सरकारी समाचार संस्था सिन्ह्वाका अनुसार जनमुक्ति सेनाको नौसेना आणविक पनडुब्बीबाट स्थानीय समयअनुसार दिउँसो १२ः०१ बजे अभ्यासका लागि नक्कली वारहेड बोकेको क्षेप्यास्त्र अन्तर्राष्ट्रिय समुद्री क्षेत्रमा प्रक्षेपण गरिएको थियो । उक्त क्षेप्यास्त्र पूर्वनिर्धारित समुद्री क्षेत्रमा खसेको जनाइए पनि चीनले त्यसको ठ्याक्कै स्थान भने सार्वजनिक गरेको छैन ।