सुरक्षण मुद्रणलाई आत्मनिर्भर र प्रतिफलमुखी बनाउने सरकारको योजना, सञ्चारमन्त्रीले दिए संसदमा जवाफ

काठमाडौं । सूचना तथा सञ्चारमन्त्री डा. विक्रम तिमिल्सिनाले सरकारले सुरक्षण मुद्रण केन्द्रलाई आत्मनिर्भर, व्यावसायिक तथा प्रतिफलमुखी संस्थाका रूपमा विकास गर्ने नीति लिएको बताएका छन्। राष्ट्रियसभाको बैठकमा सांसदहरूले उठाएका प्रश्नको जवाफ दिने क्रममा उनले यस्तो बताएका हुन्।

बैठकमा राष्ट्रियसभा सदस्य रोश्नी मेचेले दुर्गमका विद्यार्थीले कापी–किताब नपाएको अवस्थामा ‘मोबाइल फ्रिक्वेन्सी मनिटरिङ भ्यान’ का लागि १५ करोड र सुरक्षण मुद्रणका लागि २२ करोड रुपैयाँ विनियोजन गर्नुको औचित्यमाथि प्रश्न उठाएकी थिइन्। त्यसको जवाफमा मन्त्री तिमिल्सिनाले शैक्षिक सामग्री र सञ्चार पूर्वाधार फरक प्रकृतिका विषय भएकाले एउटाको बजेट अर्कोको विकल्प हुन नसक्ने बताए।