खोकनामै अड्कियो गौरवको आयोजना

काठमाडौं । राष्ट्रिय गौरवको आयोजनाको रूपमा रहेको काठमाडौं–तराई–मधेश द्रुतमार्गको खोकना–डुकुछाप खण्डका कारण प्रगति सुस्ताएको छ । काठमाडौंतर्फको प्रस्थान बिन्दु पर्ने खोकना डुकुछाप खण्डमा मुआब्जा विवाद तथा सुरु विन्दुकै विवादका कारण काम नै सुरु गर्न नसकिएपछि नेपाली सेनाले कार्यान्वयन जिम्मा लिएको गौरवको आयोजनाको प्रगति निराशाजनक भएको हो ।

काठमाडौं तराई जोड्ने फास्ट ट्र्याकका १३ मध्ये १२ प्याकेजमा काम भइरहे पनि तोकिएको समयमा निर्माण कार्य सम्पन्न हुन समस्या भइरहेको नेपाली सेनाले जनाएको छ । नेपाली सेनाले जिम्मा लिएको निर्माण कार्यमा २०८२ चैत सम्ममा ४६ दशमलव ८८ प्रतिशत भौतिक प्रगति भएको छ । फास्ट ट्र्याकमा पर्ने झण्डै ११ किलोमिटर सुरुङ र ८५ वटा पुलको निर्माण कार्यले गति लिएको नेपाली सेनाका प्रवक्ता सहायक रथी राजाराम बस्नेतले बताए ।