क्षितिजको यात्रा: सडकदेखि अन्तर्राष्ट्रिय मञ्च पुग्दाको अनुभव

इतिहास आफैँ बन्दैन, इतिहास बनाउन वर्षौँको संघर्ष, निरन्तरता र अटल विश्वास आवश्यक पर्छ। मानिसहरूले आज झापाको बिर्तामोड–१ मा बनेको भव्य नाटक घर देख्छन्, अन्तर्राष्ट्रिय सम्मानका समाचार पढ्छन् वा क्षितिज नाट्य प्रतिष्ठानको नाम सुन्छन्। तर त्यो सफलताको उज्यालो पछाडि दशकौँसम्मको अभाव, अस्वीकार, अपमान, त्याग, समर्पण र अनवरत संघर्षको लामो यात्रा लुकेको छ।

विक्रम संवत् २०५८ सालमा स्थापना भएको क्षितिज नाट्य समूह कुनै सम्पन्न संस्था थिएन। केही सपना बोकेका युवाहरूले समाज परिवर्तनमा कला र संस्कृतिको शक्तिमा विश्वास गर्दै सुरु गरेको एउटा सानो अभियान थियो। त्यसबेला न स्रोत थियो, न पूर्वाधार, न आर्थिक बल। थियो त केवल कला, समाज र परिवर्तनप्रतिको अटुट विश्वास।