जस्ताको टहरोमा सीमा कुरिरहेका सुरक्षाकर्मीको ‘बिजोग’: गृहमन्त्रीले के भने ?

विराटनगर। गृहमन्त्री सुधन गुरुङले झापाको मेचीनगर–१५ स्थित जोरसिमलमा रहेको सशस्त्र प्रहरी र नेपाल प्रहरीको संयुक्त अस्थायी चेकपोस्ट हटाउन निर्देशन दिएका छन्। सीमा क्षेत्रमा रहेका सुरक्षा चेकपोस्टहरूको निरीक्षण र अनुगमनका क्रममा झापा पुगेका गृहमन्त्री गुरुङले तत्काल पोस्ट हटाउन निर्देशन दिएका हुन्।

तीन दिनअघि विराटनगर आएका उनी मोरङ, सुनसरी र धनकुटाको अनुगमन सकेर आज झापा पुगेका हुन्। झापा पुगेका गृहमन्त्री गुरुङले जोरसिमलमा रहेको पोस्टमा सुरक्षाकर्मीहरू आधारभूत सुविधाविहीन अवस्थामा रहेको पाएपछि हटाउन निर्देशन दिएका हुन्। जोरसिमलमा सशस्त्र प्रहरी र नेपाल प्रहरीको संयुक्त पोस्ट रहेको छ। सुरक्षाकर्मीहरू जस्ताको टहरोमा बसेको देखेपछि उनले यस्तो कडा निर्देशन दिएका हुन्।