विद्युत् समस्या समाधानका लागि फिल्डमै सरकार, नेपालगञ्ज-सुर्खेतमा सुधारका पहल

काठमाडौं । नेपालगञ्ज, सुर्खेतलगायत पश्चिम नेपालमा पटक–पटक हुने विद्युत् अवरोध, न्यून भोल्टेज र विद्युत् मिटर अभावका समस्या समाधानका लागि ऊर्जा, जलस्रोत तथा सिँचाइ मन्त्री विराज भक्त श्रेष्ठ दुई दिनसम्म सम्बन्धित क्षेत्रमा पुगेर सरोकारवालासँग छलफल गरेका छन्।

ऊर्जा मन्त्रालयका सचिव, नेपाल विद्युत् प्राधिकरणका सुदूरपश्चिम, कर्णाली र लुम्बिनी प्रदेश प्रमुख, वितरण केन्द्रका अधिकारी, जनप्रतिनिधि, उद्योगी–व्यवसायी तथा स्थानीयसँगको छलफलपछि पश्चिम नेपालको वितरण प्रणाली पुरानो र जीर्ण बन्दै गएको निष्कर्ष निकालिएको छ। चार दशकअघि निर्माण गरिएका वितरण संरचनाले हालको विद्युत् माग धान्न नसक्दा फिडर, ट्रान्सफर्मर तथा अन्य उपकरणको अभावका कारण सेवा प्रभावित भइरहेको प्राधिकरणले जनाएको छ।