डेढ वर्षदेखि तलब खान नपाएका उदयपुर सिमेन्टका कर्मचारी आन्दोलित

झण्डै डेढ वर्षदेखि तलबभत्ता खान नपाएको भन्दै पूर्ण सरकारी स्वामित्वको उदयपुर सिमेन्ट उद्योग लिमिटेड जलजलेका कर्मचारीले आन्दोलन थालेका छन्। तलबभत्ता पाउनका लागि ‘उसिउलि कर्मचारी संघर्ष समिति गठन’ गरेका उनीहरूले शुक्रबार विहान पत्रकार सम्मेलन गरि आन्दोलन थालेको घोषणा गरेका हुन्।

उद्योग प्रवेशद्वार बाहिर परिसरमा आयोजित खुल्ला पत्रकार सम्मेलन संघर्ष समितिले कर्मचारीले खाइपाइ आएको तलबभत्ता, ज्यालादारी मजदुर र सुरक्षाकर्मीको पारिश्रमिक १४ महिनादेखि नपाएकाले आन्दोलन गर्न बाध्य भएको जनाएको छ। संघर्ष समितिका प्रवक्ता आनन्द कुर्मीले १४ महिनादेखि कर्मचारी मजदुरले तलबभत्तालगायत कुनै पनि सेवासुविधा नपाएकाले बाध्य भएर आन्दोलनमा उत्रिनु परेको दुःखेसो गरे।