वित्तीय साक्षरताले बदलिँदै चितवनका महिला

वैदेशिक रोजगारीका कारण श्रीमान् विदेशिएपछि घर सम्हाल्दै आएका चितवनका धेरै महिलाले अहिले उद्यमशीलताको बाटो रोज्न थालेका छन्। भरतपुर महानगरपालिकाले सञ्चालन गरेको सुरक्षित आप्रवासन (सामी) कार्यक्रमअन्तर्गतको वित्तीय साक्षरता तालिमले उनीहरूलाई आत्मनिर्भर बन्न प्रेरित गरेको छ।

भरतपुर महानगरपालिका–२३, जगतपुरकी ३१ वर्षीया आशा कँडेल यसको एउटा उदाहरण हुन्। तीन वर्षसम्म शिक्षण पेशामा आबद्ध रहेकी उनी पेशा छाडेपछि घरमै खाली बस्दै आएकी थिइन्। समय सदुपयोग गर्ने र आफ्नै व्यवसाय सुरु गर्ने सोचमा रहेकै बेला उनले सामी कार्यक्रममार्फत २१ हप्ते वित्तीय साक्षरता तालिम लिने अवसर पाइन्। यही तालिमले उनलाई बेकरी व्यवसायतर्फ आकर्षित गरायो।