विराटनगर रथयात्रामा संकलित भेटी बाढीपीडितलाई सहयोग गरिने

विराटनगरमा हालै सम्पन्न ऐतिहासिक ५९ औँ राधाकृष्ण रथयात्राका क्रममा भक्तजनबाट संकलित भेटी रकम बाढीपीडितको राहतका लागि प्रदान गरिने भएको छ। रथयात्रा मूल समारोह समितिका अनुसार यस वर्ष कुल २ लाख ८२ हजार ४१८ रुपैयाँ भेटी संकलन भएको छ।

रथयात्रामा संकलित भेटी रकम धार्मिक प्रयोजनमा मात्र सीमित नराखी सामाजिक उत्तरदायित्व अन्तर्गत विपद्मा परेका नागरिकको सहयोगार्थ उपयोग गर्ने निर्णय गरेको राधाकृष्ण मन्दिर व्यवस्थापन समितिका अध्यक्ष कैलाश रेग्मीले बताए। उनले संकलित सम्पूर्ण रकम प्रधानमन्त्री दैवी प्रकोप उद्धार राहत कोषमा जम्मा गरिने जानकारी दिए।