नेकपा निकट मजदुर संगठनले भत्कायो आफ्नो भवन, अन्य संगठनले महानगरलाई हस्तान्तरण गर्ने

नेपाली कम्युनिस्ट पार्टी (नेकपा) निकट मजदुर संगठनले सार्वजनिक जग्गामा बनेको आफ्नै संरचना भत्काएको छ। महानगरपालिकाले फिर्केखोला, पोखरा बसपार्कलगायत क्षेत्रमा बनेका अतिक्रमित संरचना हटाउन ताकेता गर्दै सार्वजनिक सूचना निकालेपछि नेकपा निकट अखिल नेपाल ट्रेड युनियन महासंघले पोखरा पृथ्वीचोकस्थित यातायात कार्यालय अगाडि रहेको आफ्नै संरचनामा डोजर लगाएर भत्काएको हो।

पोखरा महानगरपालिकाले सार्वजनिक जग्गा संरक्षण गर्ने भन्दै फिर्केखोला, पोखरा बसपार्कलगायत क्षेत्रमा बनेका अतिक्रमित संरचना हटाउन पहिलो पटक ३५ दिने सूचना निकालेको थियो। सूचनाको म्याद सकिन लाग्दा गत बुधबार महानगरले पुनः ७२ घण्टे अल्टिमेटमसहित अर्को सूचना जारी गरेको छ।