आफन्तको प्रतीक्षामा परिवार: न मृत्युको खबर न बाँचेकै खबर, काजकिरियामा पनि अलमल

भोटेकोसी बाढीपछि बेपत्ता बराहक्षेत्र -५ का ५३ वर्षीय मोहन माझीकी श्रीमती ५२ वर्षीया चन्द्रकला कोही नवआगन्तुक आउनेबित्तिकै श्रीमान्को खबर लिएर आए भन्ने ठान्छिन्। श्रीमान्का कुरा सुनेपछि उनका आँखा टिलपिलाउँछन्; ओठ काप्छन् र सम्हालिँदै श्रीमान्सँग भएको अन्तिम संवाद सुनाउँछिन्। ‘भदौ १० गते बिहान ६.३० बजेतिर उहाँ (श्रीमान्) ले भिडियो कल गर्नुभयो। केहीबेर कुरा भयो। नेटमा समस्या आउँदा कुरा बुझिएन। मैले फोन काटें। उहाँले फेरि कल गर्नुभयो, त्यतिबेला पनि नेटमा समस्या आयो’, उनले सम्हालिँदै भनिन्।

त्यो बिहान मोहनले भिडिओ कल गर्दाको अनुहार मोबाइलको पर्दामा देखिएको झझल्को चन्द्रकलाको मनमा आइरहन्छ। ‘सुरुमा बिहानको खाजा खाएर कल गरेको भन्दै घरको हालखबर सोध्नुभएको थियो। त्यसपछि केही बुझिएन’, उनले भनिन्। त्यो दिनको त्यो सामान्य भिडियो कल नै उनीहरूबिचको अन्तिम संवाद बन्न पुग्यो।