‘पार्वती’को पोस्टरमै देखियो कमजोरी, निर्माण टिमलाई किन यति हतारो ?

अभिनेत्री नीता ढुंगानाको डेब्यु निर्देशकीय चलचित्र पार्वतीको पहिलो पोस्टर सार्वजनिक भएसँगै दर्शकमाझ चर्चा सुरु भएको छ। पोस्टरको विषयवस्तु, भाव र प्रस्तुतिले प्रशंसा पाइरहेका बेला त्यसमै देखिएको एउटा गम्भीर त्रुटिले भने निर्माण टिममाथि प्रश्न उठाएको छ।

शुक्रबार सार्वजनिक गरिएका दुई पोस्टरमा बाल कलाकार अशोक दर्जी र नीतालाई केन्द्रमा राखिएको छ। पोस्टरमा नीतालाई विद्यार्थीको पहिरनमा तथा ‘अटिजम’ प्रभावित पात्रका रूपमा प्रस्तुत गरिएको देखिन्छ। एउटा पोस्टरमा अशोकले उनलाई बोकेको दृश्य छ भने अर्कोमा उनी कक्षाकोठामा बसेकी छन्।