दुई दिनमै ४ छोरी गुमाएकी विष्णु

गुल्मी । एउटै आमाले एकैपटक चार सन्तानको जन्म दिएको घटना विरलै सुन्न र देख्न पाइन्छ । गुल्मीमा पनि शनिबार एउटा त्यस्तै घटना भयो । मदाने गाउँपालिकाकी २५ वर्षीया विष्णु विकले शनिबार एकैपटक चार छोरीको जन्म दिइन् । घरबाट बेथा लागेपछि उनलाई गाउँका दिदीबहिनीको सहयोगमा प्युठान अस्पताल पु¥याइयो । दुई छोरी प्युठान अस्पताल नपुग्दै जन्मिए भने दुई छोरी प्युठान अस्पतालमा पुगेपछि ।

चार छोरीको जन्म भएपछि उनको जताततै चर्चा भयो । सामाजिक सञ्जालदेखि समाचारका हेडलाइन उनैका नाममा बने । चारमध्ये दुई छोरीको निधन भएपनि दुई छोरी भने जीवित नै थिए । आमासहित दुई छोरी बचाउन सफल भएकोमा परिवार र अस्पताल पनि खुसी थियो । आमा विष्णु पनि दुई छोरी भएपनि बाँचेकोमा आधा खुसी थिइन् । तर दुर्भाग्य, उनको त्यो खुसी २४ घण्टा पनि टिक्न सकेन । बाँचेका दुई छोरीको पनि प्युठान अस्पतालमा निधन भयो ।