गाउँ बचाउने अभियानमा रेखा, गौरी र तृप्ति

आगामी भदौ १९ गते रिलिजमा आउने फिल्म ककाकिकीले फस्ट लुक्समार्फत गाउँ बचाउने अभियानलाई आफ्नो कथाको केन्द्रमा राखेको संकेत दिएको छ।

माया इन्टरटेन्मेन्टको प्रस्तुतिमा कमेडी दरबार टिमले निर्माण गरेको फिल्मको झण्डै तीन मिनेट लामो फस्ट लुक्स सार्वजनिक गरिएको हो। सार्वजनिक सामग्रीमा अभिनेत्री गौरी मल्ल, तृप्ति नाडकर, रेखा थापा र अभिनेता महेश त्रिपाठी कुलेबारी नामको गाउँलाई कसरी परिवर्तन गर्ने भन्ने योजनामा जुटेको देखिन्छ। यही क्रममा रेखा थापाले गाउँका लागि काम गर्दा केही भइहाले के हुन्छ होला ? भन्ने चिन्ता व्यक्त गर्छिन्। त्यसको जवाफमा गौरी मल्ल एउटा सालिक त बनाउलान् नि भन्दै गाली गर्छिन्। त्यसपछि तृप्ति नाडकरले हामी नै मिस्त्री भएपछि सालिक कसले बनाइदेला त भन्दै दृश्यलाई हास्यपूर्ण बनाएकी छन्।