सुरुआती बिन्दु चोभार !

नेपालको राष्ट्रिय गौरवको बहुचर्चित आयोजना काठमाडौं–तराई/मधेस द्रुत मार्ग (फास्ट ट्र्याक) को सुरुआती बिन्दु चोभारलाई बनाउन राष्ट्रिय योजना आयोग र पूर्वाधार विकास मन्त्रालयले छलफल थालेका छन्। फास्ट ट्र्याकको सुरुआती बिन्दु खोकना बनाउँदा राज्यले यस प्रोजेक्टमा गरेको खर्बौं लगानीको उपादेयता नहुने भएकाले फास्ट ट्र्याकको सुरुआती बिन्दु चोभार बनाउने र त्यसलाई बल्खुसम्म जोड्ने गरी छलफल सुरु भएको हो।

यस विषयमा सोमबार योजना आयोग र भौतिक पूर्वाधार विकास मन्त्रालयका पदाधिकारीबिच छलफल भएको थियो। यसैगरी सोमबार नै योजना आयोगका पदाधिकारी तथा खोकनाका केही स्थानीवासीबिच पनि छलफल भएको थियो। ‘फास्ट ट्र्याकलाई कहीं न कहीं चक्रपथसम्म जोडिनैपर्छ। बिचमै ल्याएर फास्ट ट्र्याक छाड्दा यस आयोजनामा सरकारले गरेको खर्बौ लगानीको उपादेयता हुँदैन,’ राष्ट्रिय योजना आयोगका सदस्य अर्जुनजंग थापाले भने, ‘त्यसैले फास्ट ट्र्याकको सुरुआती बिन्दु चोभार बनाउने विषयमा योजना आयोग र पूर्वाधार विकास मन्त्रालयबिच छलफल भइरहेको छ।’