स्वास्थ्य समस्या समाधानमा सूक्ष्माणु

मानव र ब्याक्टेरिया, भाइरस, ढुसीजस्ता सूक्ष्माणुबिचको अन्तरसम्बन्ध जीवविकासको प्रारम्भसँगै सुरु भएको देखिन्छ। एउटा स्वस्थ मानिसको शरीरमा मानवीय कोषभन्दा अधिक संख्यामा ब्याक्टेरिया हुन्छन्। पाचन प्रणालीमा रहेका झन्डै एक किलो सूक्ष्माणु अनि छालालाई छपक्क ढाकेर बसेका अर्बौं जीवाणुले हामीलाई स्वस्थ जीवनयापनमा मद्दत गर्छन्।

लाखौं प्रजातिका ब्याक्टेरिया, भाइरस अनि फंगसहरू अस्तित्वमा रहे पनि सीमित जातका सूक्ष्माणुहरू मात्र मानवका लागि घातक छन्। समाजमा केही व्यक्ति खराब भए भन्दैमा सबै मानिसलाई अनैतिकको बिल्ला लगाउनु जस्तै हो, ब्याक्टेरियाको नामबाटै तर्सनु। असंख्य सूक्ष्माणुमध्ये कुनै लाभप्रद, धेरै तटस्थ अनि केही घातक छन्। च्याउ, दही, गुन्द्रुक, जाँड–रक्सी अनि बालीनालीको गुणात्मक अभिवृद्धिदेखि उद्योगधन्दामा समेत सूक्ष्माणुले भूमिका खेलेका छन्।