चलचित्र जय पर्शुराम "समिक्षा" | Hamro Patro
Make Kundali | Buy Tickets | Live Video Call

ब्लग - साहित्य / मनोरञ्जन

चलचित्र जय पर्शुराम "समिक्षा"





परशुराम एउटा सामाजिक विषयवस्तुमा आधारित भनिएको एउटा निष्ठावान प्रहरीको कथा हो । तराइको सेरोफेरो र औसत नेपाली समाजको रेखा कोरिएको भनिएको यस चलचित्रमा बिराज भट्टलाई मुख्य भुमिकामा देख्न पाइन्छ ।

सामाजिक पृष्ठभुमीमा अलिक धेरै नै सस्तो आतकं र केही फित्तलो चरित्रहरुकाबिच चलचित्रले घरि-घरि साउथ इण्डियन धारका चलचित्रको झल्को दिने गर्दछ । आउनुहोस रोज राणा निर्देशित यस चलचित्रको समिक्षा गरौँ ।

प्लट
त्यही पुरानो मसालेदार सिनेमा जहाँ एउटा भिलेनको साम्राज्य हुन्छ, भिलेन अनावश्यक रुपमा अपराधी र हिंसक हुन्छ । उसको अपराध आतङ्कले प्रताडित गाउँलेहरुलाई बचाउँन एकजना मसिहा प्रहरी आइपुग्दछन् । उनि पनि अाैसत मानव भन्दा अत्यन्त बलिया, बहादुर र स्वाभिमानी हुन्छन । अन्त्यमा कसरी र कसले उक्त भिलेनको साम्राज्यलाई तोड्छ या पुनः भिलेनकै चक्रब्यूमा फस्छ, त्यो हेर्नलाई चलचित्र नै हेर्नुपर्ने हुन्छ ।

यस चलचित्रमा नाइकालाई गुण्डाले घेर्दा नायक बिराज भट्ट घोडामा एउटा राजकुमार अथवा मुक्तिदाताको अागमन झै घोडाको खुट्टादेखि बिराजको अनुहारसम्म हुँदै स्लोमोशनमा देखाइन्छ । बदमासहरूले सार्वजनिक स्थलमै नायिकाको इज्जतमाथी हात लाउन खोज्दा नायकले परैबाट भिडमा फालेको धारिलो हतियार गएर गुण्डालाई लाग्नु यस चलचित्रभित्रका फ्यान्टासीहरु हुन् जुन कतिलाई चित्त बुझ्ला कत्तिलाई नबुझ्ला ।

"वापजी" अर्थात रोबिन तामाङले गाउँलेहरूलाई दबाएर राखेको गाउँमा विराज भट्ट अर्थात् एउटा मुक्तिदाता अथवा मसिहाको अवतारमा अथवा एउटा हावादार 'रबिन हुड' बनेर आउँछन् । परशुराम जगंलमा लामो कपाल पालेको, कन्दमुल खाने अनि कुटीमा बस्ने दैनिकीमा देखिन्छ । तथापि उसले गाउँलेको सहयोगी 'राधा' अर्थात निशा अधिकारीको सहयोगले वापजीका गुण्डाहरुलाई पिट्ने हुन्छ तर यो कुरा एकदम गोप्य राखिएको हुन्छ । अचानक इन्टरभलपछि उ छोटो कपाल सहित नेपाल प्रहरीको शानदार बर्दिमा देखापर्दछ । उ डिएसपी हुन्छ र वापजीलाई टक्कर दिन्छ र त्यस पछिको पुरै फिल्म वापजी र परशुरामको चोर-पुलिस खेलमैं सकिएको छ ।



कथा पटकथा र संवाद
हिन्दी, साउथ इन्डियन, बंगाली, नेपाली, भोजपुरी गरि सयभन्दा बढी चलचित्रहरु शायद यो कथामा बनिसकेका छन् । कथामा दूर्भाग्यवश केही नयाँ छैन । निशा र विराजका छोटा रोमान्टिक सिन केही ठिकै लाग्छन् र पटकथा र संवादमा केही नौलोपना छैन ।

प्रस्तुती
विराजलाई प्रहरी पोशाकमा ह्यान्डसम देखिएको छ र उनका फ्यानलाई यो चलचित्र त्यही कारणले मनपर्न सक्छ । विराजको इन्ट्रिमा हलमा ताली अवश्य बज्नसक्छ तर बाँकि सबै ठिकै छ भन्नुपर्ला । निशालाई पनि राम्रै देखाइएको छ र स्क्रीनमा केही हँसाउने काम पनि उनले गरेकि छिन् । रोबिन तामाङले भिलेनयूक्त हाउभाउ निकाल्न चाहिने भन्दा धेरै मेहेनत गरेका छन् तर पनि भिलेनको प्रभाव कमजोर छ । बाँकि सुनिल पोखरेल र देशभक्त खनालले ठिकठाकै काम गरेकाछन् ।

निर्देशन
रोज राणाले ठिकै काम गरेका छन् तर अनुमानयोग्य कथाका कारणले चलचित्र खासै जम्न सकेको छैन । परशुराम आखिर को हुन ? जगंलमा आखिर त्यसरी किन बसे ? अचानक पुलिस कसरी भए ? निर्देशन पक्षले दर्शकलाई उत्तर दिन सकेको छैन ।

प्राविधिक
क्यामरा लगायतका छायाङ्कन कार्य राम्रो छ तथापि समानखाले एक्शनको चलचित्र अवधिभर निरन्तरता पाउनुले भने बेला बेला दिक्क बनाउँछ । अब नेपालमा विदेशी चलचित्रजस्तो पास्ट पेस एक्शनको अावश्यक्ता छ भन्ने भान हुन्छ । संगीत उत्ति मनमोहक र मुखैमा झुण्डिने खाले छैन र गीतका शब्दहरु अति फितला छन्, शायद यस समयमा आएका चलचित्रको भिडमा सबैभन्दा फितलो गीतहरु यहि चलचित्रमानै छ । भीएफएक्श एकदमै फितलो गरेर दर्शकहरुको स्वादलाई कम आँकिएको छ, कला निर्देशन र कोरियोग्राफी ठिकठाकै छ ।

निश्कर्ष
नेपाली सिंगल स्क्रीन दर्शककालागी एकफेर हेर्न ठिकै होला त्यो पनि केवल विराजका कारणले, उनको एक्शन सिनमा सिठी बज्ला तर त्यसपछि केही हुने वाला छैन् । "टाईं टाईं फिस"

कुल ५ अकंमा २ प्रदान गर्दछौं ।

-----
-हाम्रो पात्रोको नियमित साप्ताहिक स्तम्भ "चलचित्र समिक्षा" सुयोग ढकाल र मन्दिप गाैतमले तयार गर्नुभएको ।



Liked by
Liked by
0 /600 characters
Hamro Patro - Connecting Nepali Communities
Hamro Patro is one of the first Nepali app to include Nepali Patro, launched in 2010. We started with a Nepali Calendar mobile app to help Nepalese living abroad stay in touch with Nepalese festivals and important dates in Nepali calendar year. Later on, to cater to the people who couldn’t type in Nepali using fonts like Preeti, Ganesh and even Nepali Unicode, we built nepali mobile keyboard called Hamro Nepali keyboard.