भूमिगत एम्बुस | Hamro Patro
DOWNLOAD APPS BY HAMRO PATRO

ब्लग - साहित्य / 'हाम्रो कविता'

भूमिगत एम्बुस





अहिले बजेको छ रातको साढे एक
भोलि विहान सखारै उठ्नुपर्ने बाध्यताको स्मरण गराई
मेरी प्रिया डाकिरहेछिन् मलाई
तर, अहँ, मलाई पटक्कै छैन निद्राको भोक
अपशोच, बारिरहेछु, इमान, मूल्य-मान्यताको शोक

एकाविहानै अखबारमा पढेथें एक कविता
दोहोर्‍याई/तेहेर्‍याई, दोहोर्‍याई/तेहेर्‍याई,
ढक्क फुलेथ्यो मुटु सन्न भएथ्यो मस्तिष्क
‘कति चर्को अनुभूति’ अनायासै चलेथ्यो ओठ
सलाम गर्दै कविलाई खोज्न थालेथें तिनले झै
मेरा वरपरका प्रायोजित मुस्कानहरु/भूमिगत मस्तिष्कहरु
सुतुरमुर्गको टाउकोझै भूमिगत ठालुका यावत प्रणालीहरु
भूमिगत भइरहेका /भइसकेका उसका एजेण्डा र निर्णयका प्रतिलिपीहरु

अहिले बजेको छ रातको साढे एक
व्यतीत भइरहेको आˆनो उर्जाशील युवावयलाई सम्झँदै
लेख्न बसेको छु कविता

जाउ प्रिय जाउ, तिमी सुत्न जाउ
म तिम्रो छातीभित्र पिलिएको-अनगिन्ती कुण्ठाहरुको कविता लेख्छु,
तिम्रो मस्तिष्कमा बाटो खोजिरहेको -अनगिन्ती दोबाटोका कविता लेख्छु
तिम्रो कलेजोमा रोपिएको -अनगिन्ती अपमानहरुको कविता लेख्छु
तिमीजस्तै लाखौं संगीहरुको टाउकोमा कुदिरहेको
वर्गयुद्ध र मुक्तिको सपनासँगै -ढोग र कुटिल हाँसोको कविता लेख्छु
धुत्र्याइँ र पाखण्डी प्रपञ्चको कविता लेख्छु
शेयर मार्केटका ब्रोकरले झै हमेशा सपनाको खरिद-विक्री गरिरहेका -
कथित शेयर होल्डरहरुको कविता लेख्छु ।

भो प्रिय अब अलमल नगर जाउ, सुत्न जाउ
बरु सपनामै भए पनि सयर गर
सदियौंदेखि कल्पेको त्यो साम्यवादी गाँऊ

यो स्याल कराउने रातमा
म मैले देखेको -एक-एक घृणित चालबाजीको कविता लेख्छु
बैंस नआई निमोठिएका -कलिला सपनाहरुको कविता लेख्छु
भित्रभित्रै फैलिएको -जासुसी जालोको कविता लेख्छु
तिमी ढुक्क होउ प्रिय,
हाप्सिलो कराइरहेको यो रातमा
म डराउन्न, लाटोकोसेरोको डरलाग्दो आवाजसँग
तिमी झै म पनि प्रतिक्षारत छु
युद्धकालका भूमिगत एम्बुस झै
कुनै बेला त पड्केलान् नि !
भूमिगत हुन नसकेका ढोंग, धुत्याइँ र पाखण्डी प्रपञ्चहरु !

- मदन प्रभात
पूर्वी नेपाल, वर्दिवास
[email protected]



Liked by
Liked by
0 /600 characters
Hamro Patro - Connecting Nepali Communities
Hamro Patro is one of the first Nepali app to include Nepali Patro, launched in 2010. We started with a Nepali Calendar mobile app to help Nepalese living abroad stay in touch with Nepalese festivals and important dates in Nepali calendar year. Later on, to cater to the people who couldn’t type in Nepali using fonts like Preeti, Ganesh and even Nepali Unicode, we built nepali mobile keyboard called Hamro Nepali keyboard.