नवजात शिशुको छाला बच्चा र वयस्क भन्दा फरक हुन्छ । यिनीहरूको छालामा सामान्य रुपमा (physiologic), क्षणिक (transient) परिवर्तन लगायत आनुवंशिक (genetic) वा विकासात्मक (developmental) समस्या देखिन सक्छन् ।
आज हामी नवजात शिशुको त्वचा/छालामा हुने सामान्य परिवर्तनको चर्चा गर्दैछौं:
1. मिलिया (Milia): मिलिया केराटिन र चिल्लो चिजले बन्ने सेतो दाना हो । यिनीहरू प्रायः नाक र गालाहरूमा हु्न्छन् र पहिलो केही महिनामा नै हराउछन् ।
2. मिलियारिया (Miliaria): यो समस्या नवजात शिशुहरूमा पसिनाको नलिको अवरोधको कारणले हुन्छ । गर्मीमा र बढि तापक्रममा बच्चा राख्दा यस्ता परिवर्तन देखिन्छन् । सघन उपचार कक्षमा भएका शिशुमा यो समम्या झन् देखिन्छ ।
3. एरिथेमा टोक्सिकम निओनाटोरम (Erythema Toxicum Neonatorum): यो नवजात शिशु जन्मेको ७२ घन्टामा देखापर्ने सामान्य परिवर्तन हो । कसैकसैमा सानो रातो दाना अथवा ससाना पिप जस्ता फोका आउछन् तर यिनीहरू एक हप्तामै हराउछन् ।
4. नवजात सिफालिक पस्टुलोसिस (Neonatal cephalic pustulosis): जन्मेको तीन हप्तामा सुरु भएर आउने यो परिवर्तन शिशुहरूको टाउको र घाँटीमा ससाना पिपका फोका जस्ता देखा पर्छन् ।
5. भेर्निक्स केसियोसा (Vernix caseosa): यो शिशु जन्मदा शरीर भरि हुने सेतो चिल्लो पदार्थ हो जसले सुरक्षा र कोमलता प्रदान गर्छ । नरम कपडाले पुछ्दा यो सजिलै हराउछ ।
6. लानुगो कपाल (Lanugo Hair): नवजात शिशुको शरीरभरि हुनसक्ने मसिना तथा लुला कपालहरू जन्मेको केही हप्तामै झर्छन् ।
7. जन्मदागहरू: नवजात शिशु जन्मदा उसको शरीरमा विभिन्न प्रकारका विभिन्न रंगका जन्मदागहरू हुन सक्छन् । यस्ता दागहरू कुनै आफैं हराउने हुन्छन् भने कुनैलाई चर्मरोग कै चिकित्सकसँग परामर्श लिनु पर्छ ।
8. पानीफोका आउने वा छालाको पत्र निस्कने: कुनै नवजात शिशुहरूको हात र खुट्टाको छाला पत्र पत्र गरेर उक्किने हुनसक्छ। यसको कारणमा शिशुहरूको पाठेघर भित्र र बाहिरको वातावरणमा समायोजन नभएर हो ।
9. नवजात जन्डिस: नवजात शिशुहरूमा जन्डिस देखिदैमा डराईहाल्नु पर्दैन । सामान्य कारण स्तनपान देखी रगत, कलेजो औषधिको प्रयोग वा अन्य रोगले गर्दा पनि जन्डिस हुन सक्छ । जन्डिसमा छाला र आँखा पहेँलो हुन्छ ।
यी छाला परिवर्तनहरू सामान्यतया सौम्य हुन्छन् र उपचार बिना आफैं पनि समाधान हुन सक्छन् । यदि आफ्नो बच्चाको छाला सम्बन्धि सल्लाहको लागि नजिकको चिकित्सक (छालारोग विषेशज्ञ) संग परामर्श गर्नुहोस् वा हजुरहरूले हाम्रो पात्रो हेल्थबाट अनलाइन परामर्श पनि लिन सक्नुहुन्छ ।
Liked by:
