हजुरले कहिले कल्पना गर्नुभएको छ कि हजुरको खातामा पैसा आयो त्यो पनि हजुर सुतिरहेको बेला । हामीलाई लाग्न सक्छ यो साँचो होईन, तर यो सम्भव छ । हामी प्राय दिनदिनै जागिरमा जान्छाै वा व्यापार व्यवसाय गर्छाै जसले हामीलाई नियमित आयको स्रोत दिन्छ । तर जागिर, व्यवसाय वा व्यापारबाट हुने आयमा प्राय: सीमितता हुन्छ । यसमा हामीले सक्रिय सहभागिता, समय र निरन्तर प्रयास गर्नुपर्छ । तपाइँको आम्दानी तपाइँले काम गर्ने समय सँग सीधै जोडिएको हुन्छ र यसबाट आम्दानी बढ्ने सम्भावना पनि सीमित हुन्छ । यदि तपाईंले आफ्नो जागिर गुमाउनु भयो वा तपाईंको व्यवसायमा समस्याहरू आयो भने, तपाईंको आम्दानी अचानक हराउन सक्छ, जसले तपाईंको वित्तीय अवस्थामा अस्थिरता निम्त्याउँछ ।
आफ्नो आर्थिक अवस्था सुधार गर्नका लागी नियमित आयका स्रोतका अलावा निष्क्रिय आयका स्रोतहरू समावेश गर्न सक्नुहुन्छ । यसले गर्दा तपाईंको आयमा विविधीकरण हुन्छ जसले विभिन्न जोखिमहरू आइपर्दा पनि हजुरको आर्थिक अवस्था स्थिर हुन्छ र दीर्घकालीन रुपमा वित्तीय स्वतन्त्रता दिन्छ । आफ्नो मानसिकतामा परिवर्तन गर्नुहोस्, निष्क्रिय आयका अवसरहरू पहिचान गर्नुहोस्, आफ्नो वित्तीय लक्ष्य तय गर्नुहोस्, सिस्टम निर्माण गर्नुहोस् र धैर्य र दृढताका साथ लाग्नुहोस् । निष्क्रिय आय सिर्जना गर्नु भनेको एकैरातमा हुने प्रक्रिया होइन । यस लेख मार्फत हजुरहरूलाई निष्क्रिया आय कमाउने स्रोतको बारेमा जानकारी दिनेछाै ।
१. सम्पत्ति भाडामा दिने:
हामीसँग भएको सम्पत्तिहरू भाडा दिएर पैसा कमाउन सकिन्छ जस्तै घरमा भएको कोठा वा फ्याल्ट भाडामा दिने, जग्गा लिजमा दिने, आदि । काठमाडौं, पोखरा वा अन्य सहरमा भाडामा बस्ने र जग्गा लिजमा चाहनेहरूको माग उच्च रहेको छ । हामीले घर वा जग्गाको उचित व्यवस्थापन र मर्मतसम्भार गरेर भाडामा दिएर त्यसबाट आम्दानी लिन सकिन्छ । यसले निरन्तर नगद प्रवाह प्रदान गर्न सक्छ ।
२. स्टक (शेयर) किन्ने:
अर्को निष्क्रिय आयको स्रोत भनेको कुनै कम्पनीको स्टक वा शेयरहरूमा लगानी गर्ने हो । नेपाल स्टक एक्सचेन्जमा सूचीकृत कम्पनीहरू खोज्नुहोस् जसले लगातार राम्रो लाभांश दिइरहेका हुन्छन् । लाभांश भनेको कम्पनीको मुनाफाको अंश हो जुन यसका शेयरधनीहरूलाई वितरण गरिन्छ, जसले तपाईंलाई दिनहुँको कार्यहरूमा सक्रिय रूपमा भाग नलिई नियमित आम्दानी प्राप्त गर्न सक्नुहुन्छ ।
३. डिजिटल उत्पादन र अनलाइन पाठ्यक्रमहरू:
आजको डिजिटल युगमा अर्को निष्क्रिय आयको उत्कृष्ट स्रोत भनेको डिजिटल उत्पादनहरू वा अनलाइन पाठ्यक्रमहरू सिर्जना गरेर बेच्ने हो । आफ्नो विशेषता पहिचान गर्नुहोस् र त्यस विशेषता अनुसार डिजिटल उत्पादन बनाउनुहोस् । डिजिटल उत्पादनहरूमा एप, सफ्टवेयर, चित्र, फोटो, अडियो, ब्लग, बेबसाईट, ई-पुस्तक, अनलाइन पाठ्यक्रम, भिडियो, संगीत, आदि पर्दछन् । अब यी डिजिटल उत्पादनहरू आफ्नै वेबसाइट वा पहिले नै उपलब्ध प्लेटफर्महरूमा बिक्रीमा राखेर आय उत्पादन गर्न सक्नुहुन्छ । तपाईंको आफ्नो उत्पादनहरूलाई प्रभावकारी रूपमा प्रवर्द्धन गर्न सोशल मिडिया र मार्केटिङ प्रविधिहरूको सहायता लिनुहोस् ।
४. सम्बद्ध मार्केटिङ:
सम्बद्ध मार्केटिङले तपाईंलाई अन्य कम्पनीका उत्पादन वा सेवाहरूको प्रचार गरेर पैसा कमाउन अवसर दिन्छ । कम्पनीहरूसँग सम्बद्ध मार्केटरको रूपमा साइन अप गरेर तपाईंको रेफरल लिङ्कहरू मार्फत हुने प्रत्येक बिक्रीको लागि कमिसन प्राप्त गर्न सक्नुहुुन्छ । ब्लग वा वेबसाइटमा जानकारीमूलक सामग्री लेख्नुहोस्, र त्यहि लेखहरूमा सम्बद्ध लिङ्कहरू राख्नुहोस् ।
५. रोयल्टी र इजाजतपत्र:
यदि तपाईंसँग रचनात्मक सीपहरू छन् भने, रोयल्टीहरू र इजाजतपत्रहरू मार्फत निष्क्रिय आम्दानी कमाउन सक्नुहुन्छ । चाहे किताबहरू होस्, संगीत होस्, कला सिर्जना होस्, वा सफ्टवेयर होस्, तपाईंले आफ्नो कामको दर्ता गराइ अरूलाई प्रयोग गर्न दिँदा वा बेच्दा रोयल्टीहरूबाट हजुरहरूले कमाउन सक्नुहुन्छ । प्रकाशन कम्पनीहरू, संगीत स्ट्रिमिङ प्लेटफर्महरू, ग्यालरीहरू, वा सफ्टवेयर बजारहरूमा खोजी गर्नुहोस् जसले तपाईंको सिर्जनाहरूको रोयल्टी खरिद गर्छ र त्यसबाट पनि आय कमाउन सकिन्छ ।
निष्क्रिय आम्दानीको (Passive Income) सहायताले तपाईंको आर्थिक अवस्था परिवर्तन गर्न सक्छ र आर्थिक स्वतन्त्रता प्रदान गर्छ । तर निष्क्रिय आय निर्माण गर्न समय र निरन्तर प्रयास भने लाग्छ ।
Liked by:
