रास्वपा सभापति रवि लामिछानेको दिल्ली यात्रा कूटनीतिक चासोको केन्द्रमा

काठमाडौं- सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछाने आगामी साता भारत भ्रमणमा जाने भएका छन् । भारतको विदेश मन्त्रालयको निमन्त्रणामा हुन लागेको यो भ्रमणलाई वर्तमान सरकार गठनपछि नेपाल-भारत सम्बन्धको सन्दर्भमा अर्थपूर्ण रूपमा हेरिएको छ ।

जुन १ र २ जेठ १८–१९ मा हुने भ्रमणका क्रममा लामिछानेले भारतीय विदेशमन्त्री एस जयशंकर, विदेश सचिव विक्रम मिश्रीलगायत उच्च अधिकारीसँग भेटवार्ता गर्ने कार्यक्रम तय भएको रास्वपा स्रोतले जनाएको छ। भारतीय प्रधानमन्त्री नरेन्द्र मोदीसँग पनि भेट हुन सक्ने चर्चा भए पनि त्यसबारे अन्तिम टुंगो लागिसकेको छैन ।