बजेट अभावमा रुमल्लियो धनगढी विमानस्थल विस्तारको सपना

धनगढी । सुदूरपश्चिम प्रदेशको लाइफलाइनका रूपमा रहेको धनगढी विमानस्थललाई क्षेत्रीय स्तरको अत्याधुनिक विमानस्थल बनाउने सरकारी योजना तीन आर्थिक वर्षदेखि कागजमै सीमित भएको छ। तामझामका साथ घोषणा गरिएको जग्गा अधिग्रहण र धावनमार्ग विस्तारको काम बजेट अभाव र सरकारी प्राथमिकतामा नपर्दा हाल पूर्ण रूपमा ठप्प भएको हो।

२०७८ सालमा तत्कालीन संस्कृति, पर्यटन तथा नागरिक उड्डयनमन्त्री प्रेमबहादुर आलेको सक्रियतामा धनगढी विमानस्थललाई क्षेत्रीय विमानस्थलका रूपमा विकास गर्ने प्रक्रिया अगाडि बढाइएको थियो। तर, उक्त योजनाले तीन आर्थिक वर्ष बितिसक्दा पनि ठोस गति लिन सकेको छैन। सुरुमा बजेट विनियोजनको हल्ला गरिए पनि स्रोत सुनिश्चित हुन नसक्दा अहिले यो आयोजना चर्चाबाटै हराउन थालेको छ।