वीरगन्जका मेयर सिंहलाई अदालतमा उपस्थित गराइयो

काठमाडौँ- पर्साको वीरगन्ज महानगरपालिकाका प्रमुख राजेशमान सिंहलाई अदालतमा उपस्थित गराइएको छ। सिंहको मुद्दा मुख्यन्यायाधीश गायत्री प्रसाद रेग्मीको इजलासमा परेको छ। स्रेस्तादार प्रभाकर मल्लिकका अनुसार अब उक्त मुद्दामा बयान लिने र थुनछेक बहस हुनेछ। बहसपछि अदालतले मेयर सिंहलाइ पुर्पक्षका लागि थुनामा पठाउने, धरौटीमा रिहा गर्ने वा साधारण तारेखमा छाड्नेबारे आदेश दिनेछ।

सिंहलाई मंगलबार बिहान ६ बजे पर्साको ठोरीबाट पक्राउ गरेको जिल्ला प्रहरी कार्यालयका प्रवक्ता डीएसपी राजु कार्कीले जानकारी दिए। पर्सा जिल्ला अदालतले उनलाई लिखत किर्ते कसुरमा पक्राउ पुर्जी जारी गरेको थियो।