युवाको डिजिटल क्षमता र रोजगारी तत्परता बुझ्न राष्ट्रव्यापी सर्वेक्षण गर्दै युथ इनोभेसन ल्याब

काठमाडौं । नेपाली युवाहरूमा रहेको डिजिटल सीपको अवस्था, उनीहरूको आकांक्षा र प्रविधिमा पहुँचका क्रममा भोग्नुपरेका अवरोधहरू पहिचान गर्ने उद्देश्यले एक राष्ट्रव्यापी सर्वेक्षण सुरु गरिएको छ । गैर-नाफामूलक संस्था ‘युथ इनोभेसन ल्याब’ ले देशभरका युवाहरूको डिजिटल अवस्थाबारे आधिकारिक तथ्याङ्क लिन ‘नेपाल युवा डिजिटल तत्परता सर्वेक्षण’ (Nepal Youth Digital Readiness Survey) थालनी गरेको हो ।

सातै प्रदेशलाई समेट्ने यस सर्वेक्षणमा १८ देखि ३५ वर्ष उमेर समूहका युवाहरू सहभागी हुन सक्नेछन् । सर्वेक्षणले विशेषगरी युवाहरूको डिजिटल सीप, रोजगारी प्राप्तिको क्षमता र प्रविधिसँग सम्बन्धित अवसरहरू प्राप्त गर्दा उनीहरूले भोगेका वास्तविक समस्याहरूको तथ्याङ्क संकलन गर्ने बताइएको छ ।