वीर अस्पतालको नेतृत्वविहीन अवस्थामा उदासीन सरकार

देशमा सुशासन, सेवा सुधार र द्रुत निर्णय प्रक्रियाको प्रतिबद्धता व्यक्त गरिरहेको सरकारले केही क्षेत्रमा उल्लेखनीय कामको थालनी गरेको छ । तर नागरिकको जीवनसँग प्रत्यक्ष जोडिएको स्वास्थ्य क्षेत्रका केही आधारभूत विषय भने अझै पुरानै ढर्रामा अल्झिएका छन् । त्यसको सबैभन्दा ज्वलन्त उदाहरण हो– देशकै सबैभन्दा ठूलो, पुरानो र केन्द्रीय रेफरल अस्पताल वीर अस्पताल तथा चिकित्सा विज्ञान राष्ट्रिय प्रतिष्ठान (न्याम्स) को चार महिनादेखिको नेतृत्वविहीन अवस्था ।

अध्यादेशमार्फत तत्कालीन पदाधिकारी हटाइएपछि उपकुलपतिबाहेक रजिस्ट्रार, डिन, अस्पताल निर्देशक तथा अन्य महत्वपूर्ण पदहरू अझै रिक्त छन् । परिणामतः संस्थाको निर्णय प्रक्रिया नै अवरुद्ध भएको छ । कार्यवाहक नेतृत्वले नियमित प्रशासन धानिरहेको भए पनि कानुनी अधिकारको सीमाभित्र रहेर दीर्घकालीन वा ठूलो आर्थिक, प्रशासनिक र शैक्षिक निर्णय गर्न सक्दैन । यस्तो अवस्थामा दैनिक हजारौँ बिरामीको उपचार गर्ने अस्पताल र देशकै प्रमुख चिकित्सा शिक्षण संस्थाको भविष्य काम चलाउ व्यवस्थामै अड्किनु चिन्ताको विषय हो ।