बिहे नगरेको अभियोगमा समाजको कठघरामा म!

‘सन्चै छस्? आजभोलि कता?’ पछिको प्रश्न सजिलै अनुमान गर्न सकिन्छ किनकि उमेर पुगेका हरेक अविवाहितका लागि त्यो प्रश्न मौसमको भविष्यवाणीभन्दा पनि निश्चित र सूर्य पूर्वबाट उदाउने भन्दा पनि सत्य हुन्छ।

राज्यको कानुनअनुसार म एक सामान्य नागरिक हुँ। तर समाजको आफ्नै एउटा कानुन छ, जसको बारेमा संविधानमा कतै लेखिएको छैन। त्यो कानुनअनुसार एउटा निश्चित उमेर पार गरेपछि बिहे नगर्नु अपराध सरह हो। त्यसैले अहिले म समाजको अदालतमा वर्षौँदेखि कठघरामा उभिएको अभियुक्त हुँ। मेरो अभियोग एउटै छ ‘यत्रो उमेर भयो, अझै बिहे किन नगरेको?’