जलविद्युत्को दममा नेप्से हरियो, कारोबार ३ अर्ब ७२ करोड नाघ्यो

काठमाडौं– बिहीबार सेयर बजार हरियो भएर बन्द भएको छ । जलविद्युत् समूहमा लगानीकर्ताको सक्रियता बढेपछि नेप्से परिसूचक ८.८१ अंकले उकालो लागेर २६५१.२१ विन्दुमा पुगेको हो । अघिल्लो कारोबार दिन नेप्से सामान्य ०.५५ अंकले मात्रै बढेको थियो। यस दिन भने १७१ कम्पनीको सेयर मूल्य बढ्दा ८६ कम्पनीको घट्यो भने १९ कम्पनीको मूल्य स्थिर रह्यो ।

कारोबार रकममा पनि सुधार देखिएको छ। बुधबार ३ अर्ब ५३ करोड रुपैयाँ बराबरको कारोबार भएको बजारमा बिहीबार ३ अर्ब ७२ करोड रुपैयाँभन्दा बढीको सेयर किनबेच भएको छ । समूहगत सूचकमा ठूलो उतारचढाव देखिएन। बैंकिङ, विकास बैंक, होटल तथा पर्यटन, जलविद्युत्, जीवन बीमा, उत्पादन तथा प्रशोधन, माइक्रोफाइनान्स, निर्जीवन बीमा र अन्य समूह सामान्य रूपमा बढेका छन्। लगानी समूह भने ०.४९ प्रतिशतले घटेको छ ।