परराष्ट्र नीतिमा राष्ट्रिय सहमति नहुँदा देश संकटमा ! ‘बफर’, ‘ब्रिज’ कि ‘सफ्ट बेली’ ?

काठमाडौँ । पछिल्लो समय नेपालको भूराजनीति पेचिलो बन्दै गएको छ भने मुलुक वैश्विक र क्षेत्रीय शक्ति राष्ट्रहरूको तीव्र प्रतिस्पर्धा र चासोको केन्द्र बनेको छ । उत्तर–दक्षिणका दुई छिमेकी— उदीयमान आर्थिक शक्ति भारत र चीनका अतिरिक्त पश्चिमा शक्तिराष्ट्र अमेरिका तथा युरोपियन युनियनका नीतिगत प्रभाव, सहायता नियोग र रणनीतिक चासोले नेपालको भूराजनीतिक अवस्थालाई अत्यन्तै पेचिलो र संवेदनशील बनाएको छ । एमसीसी, बीआरआई र अन्य कनेक्टिभिटीका परियोजनाहरूमा देखिएका खिचातानीले समेत नेपाल रणनीतिक ‘सफ्ट बेली’ वा निगरानीको केन्द्र बन्दै गएको स्पष्ट हुन्छ । यसै सन्दर्भमा नेपाल कानुन समाज र संविधान निगरानी समूहद्वारा आयोजित ‘नेपालको परराष्ट्र नीतिः अवसर, चुनौती र भावी कार्यदिशा’ विषयक अन्तरक्रिया कार्यक्रममा परराष्ट्र मामिलाका विज्ञ, पूर्वमन्त्री र पूर्व–प्रधानन्यायाधीशहरूले यस विषयमा गम्भीर चासो र चर्चा गरेका छन् ।

भूराजनीतिक पेचिलोपन र आन्तरिक कमजोरी