इन्डोनेसियामा भीषण खडेरी : पानी सुक्दा फेरि देखियो जलाशयमुनि पुरिएको पुरानो गाउँ

इन्डोनेसियामा जारी लामो र गम्भीर खडेरीका कारण एक दशकअघि जलाशय निर्माणका क्रममा पानीमुनि डुबेको पुरानो गाउँ फेरि सतहमा आएको छ।

बान्टेन प्रान्तमा रहेको करियन जलाशयमा पानीको सतह अत्याधिक घटेपछि सोमाङ गाउँका घर, सडक, जग र मस्जिदका भग्नावशेषहरू खुला रूपमा देखिन थालेका छन्। ग्रेटर जकार्ता क्षेत्रमा पानी आपूर्ति गर्ने उद्देश्यले सन् २०१५ देखि २०२३ बिच निर्माण गरिएको यस जलाशयमा विगत चार महिनादेखि वर्षा नभएका कारण पानीको सतह निकै तल झरेको छ। मौसम एजेन्सी बीएमकेजीका अनुसार यो वर्ष इन्डोनेसियाले लामो समयदेखि एल निनोको प्रभाव खेपिरहेको छ, जसले गर्दा देशका आधाभन्दा बढी क्षेत्रमा गम्भीर खडेरी र डढेलोको समस्या सिर्जना भएको छ।