सेनामा २८० जनाका लागि जागिर खुल्यो

काठमाडौं । नेपाली सेनाको भर्ना छनोट निर्देशनालय, जङ्गी अड्डाले रिक्त रहेको अधिकृत क्याडेट (सहायक सेनानी) पदका लागि ठूलो संख्यामा दरखास्त आह्वान गरेको छ । शुक्रबार (साउन २९) प्रकाशित सूचना अनुसार, सेनाले खुला तथा समावेशी प्रतिस्पर्धाद्वारा पदपूर्ति गर्नका लागि कुल २८० जना नयाँ क्याडेटको माग गरेको हो ।

जसमा खुलातर्फ १४६ जना, महिला २४, आदिवासी/जनजाति ३९, मधेसी ३३, दलित १८, पिछडिएको क्षेत्र ६ र कर्तव्य पालनाको सिलसिलामा मृत्यु भएका वा शारीरिक रूपमा अशक्त सैनिकका सन्ततिका लागि १४ जनाको कोटा निर्धारण गरिएको छ। योग्यता पुगेका इच्छुक नेपाली नागरिकले नेपाली सेनाको आधिकारिक वेबसाइट https://vacancy.nepalarmy.mil.np मार्फत अनलाइन आवेदन दिनुपर्ने निर्देशनालयले जनाएको छ।