युवालाई देशमै रोक्ने नीति ल्याऊ सरकार

कुनै पनि देशको विकास, समृद्धि र भविष्य निर्माणको मुख्य आधार भनेकै युवा जनशक्ति हो । युवा देशका वर्तमान मात्र होइनन्, उनीहरू नै देशका भविष्यका निर्माता पनि हुन् । त्यसैले कुनै पनि सरकारले देशको नीति, योजना र कार्यक्रम निर्माण गर्दा युवालाई केन्द्रमा राखेर अघि बढ्नुपर्ने हुन्छ । तर आज नेपालको अवस्था हेर्दा देशको सबैभन्दा महत्वपूर्ण शक्ति मानिएको युवा जनशक्ति दिनप्रतिदिन विदेश पलायन भइरहेको छ । गाउँका खेतबारी बाँझिँदै छन्, उत्पादन घट्दै गएको छ, परिवारहरू विखण्डित हुँदै छन् र देशको ठूलो जनशक्ति आफ्नो श्रम र सीप विदेशी भूमिमा बेच्न बाध्य भइरहेको छ । यो अवस्था देशका लागि गम्भीर चुनौती हो ।

सरकारले अब युवाको विदेश पलायनलाई केवल व्यक्तिगत रोजगारीको विषयका रूपमा हेरेर पुग्दैन । यो राष्ट्रिय समस्या हो, राष्ट्रिय चिन्ताको विषय हो । आज एउटा युवा विदेश जान्छ भने त्यससँगै एउटा परिवारको आशा, एउटा गाउँको श्रमशक्ति र एउटा देशको उत्पादनशील क्षमता पनि विदेशिन्छ । त्यसैले सरकारले तत्कालै युवालाई देशमै रोक्ने स्पष्ट, दीर्घकालीन र व्यावहारिक नीति ल्याउन आवश्यक छ ।