कुरिल द्वीप समूहमा रुस र जापानको विवाद के हो ?

काठमाडौं- रुसी राष्ट्रपति व्लादिमिर पुटिनले जापानले आफ्नो भूभाग भएको दाबी गर्दै आएको विवादित कुरिल द्वीप समूहको पहिलोपटक भ्रमण गरेका छन्। बिहीबार भएको भ्रमणका क्रममा पुटिनले द्वीपमा रहेको माछा प्रशोधन केन्द्रको निरीक्षण गरेका थिए। क्रेमलिनले उनको भ्रमणसँग सम्बन्धित दृश्यसमेत सार्वजनिक गरेको छ।

पुटिनको भ्रमणप्रति जापानले कडा आपत्ति जनाएको छ। प्रशान्त महासागरमा रहेका चारवटा द्वीपलाई लिएर रूस र जापानबीच करिब ८० वर्षदेखि विवाद हुँदै आएको छ। जापानले यी द्वीपलाई ‘उत्तरी क्षेत्र’ भन्दै आफ्नो भूभाग दाबी गर्दै आएको छ भने रूसले आफ्नो कुरिल द्वीप समूहको हिस्सा मान्दै आएको छ। चार द्वीपमा कुनाशिर, इतुरुप, शिकोतान र हाबोमाई पर्छन्।