१४औँ महाधिवेशनबाट निर्वाचित नेतृत्वलाई मात्र १५औँ महाधिवेशन गराउने अधिकार छ : निधि

काठमाडौं- नेपाली कांग्रेसका नेता विमलेन्द्र निधिले १४औँ महाधिवेशनबाट निर्वाचित पदाधिकारी र नेतृत्वलाई मात्र आगामी १५औँ महाधिवेशन गराउने वैध अधिकार रहेको स्पष्ट पारेका छन् । शेरबहादुर देउवा पक्षद्वारा आयोजित राष्ट्रिय भेलालाई सम्बोधन गर्दै उनले विधानसम्मत नेतृत्वले मात्र पार्टीलाई एकताबद्ध र एक सूत्रमा बाँधेर लैजान सक्ने बताए ।

कार्यक्रममा बोल्दै नेता निधिले आयोजना गरिएको राष्ट्रिय भेलाको मुख्य उद्देश्य नै आगामी १५औँ महाधिवेशनमा नेपाली कांग्रेसलाई पूर्ण रूपमा एकताबद्ध बनाएर लैजानु रहेको उल्लेख गरे । आधिकारिक र निर्वाचित निकायबाहेक अरू कसैलाई पनि पार्टीको महाधिवेशन गराउने संवैधानिक तथा वैधानिक अधिकार नरहेको उनको भनाइ थियो ।