लिदिङखोला मोटरेबल पुल : जोखिमपूर्ण यात्रा गर्छन् स्थानीय

खोटाङ । ऐसेलुखर्क गाउँपालिका-३ ऐसेलुखर्क बजार र सेलुखर्क-१ राखाबाङ्देलको सिमानामा पर्ने लिदिङ खोलामा दुई वर्षभित्र बन्नुपर्ने मोटरेबल पक्की पुल निर्माण नहुँदा स्थानीयले जोखिमपूर्ण यात्रा गरिरहेका छन् । दुई वर्षमा बन्नुपर्ने पुल छ वर्षसम्म नबनेपछि स्थानीयसहित विद्यार्थीलाई सास्ती हुँदै आएको हो ।

कच्ची सडकमार्फत हिउँदको समयमा मात्र यातायात सञ्चालन हुँदै आएको लिदिङखोलामा मोटरेबल पुल विसं २०७९ भदौ २४ गतेभित्र सम्पन्न गर्ने गरी विसं २०७७ फागुन २८ गते ठेक्का लगाइएको थियो । निर्माण कम्पनी पुष्पाञ्जली-जिम्बा जेभीको ढिलासुस्तीका कारण हालसम्म यहाँ पक्की पुल बन्न नसकेको हो ।