ताप्लेजुङ फुङ्लिङ बजारमा पनि ‘वानवे’ प्रणाली

ताप्लेजुङको फुङ्लिङ बजारमा बढ्दो सवारी चाप र अव्यवस्थित पार्किङ व्यवस्थापन गर्न चारपाङ्ग्रे सवारीसाधनका लागि एकतर्फी यातायात लागू गरिने भएको छ। जिल्ला ट्राफिक प्रहरी कार्यालयले आइतबारदेखि सूचना प्रवाह र सोमबारदेखि नयाँ व्यवस्था कडाइका साथ कार्यान्वयन गर्ने जनाएको छ।

नयाँ व्यवस्थाअनुसार तोक्मेतर्फ जाने सवारीसाधन बुद्धचोक–तोक्मे हाट हुँदै बाहिरिनुपर्नेछ भने तोक्मेबाट बजार प्रवेश गर्ने सवारी दोबाटो हुँदै आउनुपर्नेछ। दोबाटोबाट कोप्चे हुँदै वीरेन्द्रचोक जान सकिने भए पनि वीरेन्द्रचोकबाट कोप्चे हुँदै पुनः दोबाटोतर्फ जान भने पाइने छैन।