सरकारले अब आफूलाई चाहिने सफ्टवेयर आफैँ बनाउने, छुट्टै डेभलपमेन्ट सेन्टरको तयारी

काठमाडौं । सूचना प्रविधि क्षेत्रमा आत्मनिर्भर बन्न सरकारले आफैँ सफट्वेयर विकासको काम थालेको छ । शुक्रबार राजधानीमा आयोजित सीएनआई बजेट वाच कार्यक्रममा बोल्दै नेपाल सरकारका मुख्यसचिव गोविन्द बहादुर कार्कीले सरकारी सफ्टवेयरको पूर्ण स्वामित्व र सुरक्षा सुनिश्चित गर्न सरकारले सफ्टवेयर डेभलपमेन्ट सेन्टर खोल्न लागेको जानकारी दिए ।

सूचना प्रविधि प्रणालीमा वैदेशिक परनिर्भरता बढ्दा सुरक्षा र अपग्रेडमा समस्या आएको उल्लेख गर्दै मुख्यसचिव कार्कीले भने, "अहिले धेरै आईटी सिस्टमहरू विदेशी भेन्डर र थर्ड पार्टीबाट बनेका छन्, जसको कन्ट्रोल र ओनरसिप हामीसँग छैन। यसले गर्दा पुराना सिस्टम अपग्रेड गर्न र सोर्स कोड प्राप्त गर्न कठिन भइरहेको छ । त्यसैले, अब सरकारी सफ्टवेयरहरू सरकारकै निकायले बनाउने गरी निकट भविष्यमै सफ्टवेयर डेभलपमेन्ट सेन्टर खुल्दैछ ।"