ताल्चा विमानस्थलमा खुला सेप्टिक ट्यांकीमा डुबेर ११ वर्षीय बालकको मृत्यु

मुगुको छायाँनाथ रारा नगरपालिका–४ ताल्चास्थित ताल्चा विमानस्थलमा निर्माणाधीन टर्मिनल भवनको खुला सेप्टिक ट्यांकीमा डुबेर ११ वर्षीय बालक गौरव भामको मृत्यु भएको छ। करिब १४ फिट गहिरो ट्यांकीमा जम्मा भएको वर्षाको पानीमा डुबेर स्थानीय जयबहादुर भामका छोराको मृत्यु भएको हो।

शनिबार दिउँसो करिब २:४० बजे ट्यांकीनजिक बालकका लुगा र चप्पल भेटिएपछि स्थानीयले विमानस्थलका सुरक्षा गार्डलाई खबर गरेका थिए। सहायक प्रहरी निरीक्षक बिर्खराज गुरुङको नेतृत्वमा प्रहरी टोली घटनास्थलमा पुगेपछि ट्यांकीको पानी बाहिर निकाल्दा बालकलाई मृत अवस्थामा फेला पारेको जिल्ला प्रहरी कार्यालय मुगुले जनाएको छ।