वर्षासँगै पहिरो झरेपछि पश्चिमका तीन सडक पूर्ण रूपमा बन्द

लगातारको वर्षाका कारण पहिरो र बाढी आएपछि लुम्बिनी र कर्णाली प्रदेशका तीन प्रमुख सडकखण्ड पूर्ण रूपमा अवरुद्ध भएका छन्। सडक अवरुद्ध हुँदा ग्रामीण तथा दुर्गम क्षेत्रको यातायात प्रभावित भएको छ।

लुम्बिनी प्रदेशको रोल्पामा थबाङ गाउँपालिका–२ स्थित शाइलामाइली मोडमा पहिरो खसेपछि सहिद मार्ग सडकखण्ड पूर्ण रूपमा बन्द भएको छ। पहिरोका कारण सडकमा सवारीसाधन आवतजावत गर्न नसक्ने अवस्था बनेको हो। सहिद मार्ग रोल्पा हुँदै रुकुमपूर्व जोड्ने महत्वपूर्ण सडकका रूपमा रहेको छ। वर्षायाममा यस मार्गमा पटक–पटक पहिरो खस्दै आएको छ।