आफ्नै नेतृत्वको सरकारबाट किन अपदस्थ भयौं, गम्भीर समीक्षा जरुरी छ: पोखरेल

नेपाल कम्युनिष्ट पार्टी (एमाले) का महासचिव शङ्कर पोखरेलले जनमत वामपन्थी शक्तिबाट टाढिनु र आफ्नै नेतृत्वको सरकारबाट अपदस्थ हुनुपरेको यथार्थबारे निर्मम समीक्षा गर्नुपर्ने बताएका छन्।

विगतका कमजोरीहरूको गम्भीर समीक्षा नगरी वामपन्थी आन्दोलनको पुनर्गठन सम्भव नहुने उनको भनाइ छ। समाजवाद अध्ययन केन्द्र नेपालद्वारा काठमाडौंमा आयोजित ‘वामपन्थी आन्दोलन अब के गर्ने ? राष्ट्रिय बहस !’ विषयक अन्तरक्रियालाई सम्बोधन गर्दै महासचिव पोखरेलले जनमत आफूहरूबाट विमुख हुनुको मुख्य कारण पहिचान गर्नुपर्ने औँल्याए।