कमेडी लिगमा राजेश हमाल प्रेसिडेन्ट, सुरक्षा र लुनिभासंगै ४ कलाकार क्याप्टेन

कमेडी एक्टमा आधारित रियालिटी शो सुपर कमेडी लिग आउने भएको छ। ओपन डोर्स इन्टरटेन्मेन्टले निर्माण गर्ने शोको ललितपुरमा आयोजित पत्रकार सम्मेलनमार्फत जानकारी गराइएको होे।

हास्यव्यग्यमा आधारित यो रियालिटी शोमा ख्यातिप्राप्त अभिनेता राजेश हमालले लिग प्रेसिडेन्टको भूमिका निर्वाह गर्नेछन्। कलाकारहरू विल्सन विक्रम राई, सुरक्षा पन्त, लुनिभा तुलाधर र रवीन्द्र झा क्याप्टेन तथा मेन्टरका रूपमा रहनेछन्। कार्यक्रमका लागि ५ सहरमा अडिसन आयोजना गरिने भएको छ। दमकस्थित कदम थिएटर, नारायणगढस्थित राइनो वाटर होटल, नेपालगन्जस्थित सिद्धार्थ होटल, पोखरास्थित पोखरा थिएटर र काठमाडौंमा अडिसन गरिने आयोजकले जनाएका छन्। अडिसनबाट ३२ जना प्रतियोगी छनोट गरिनेछ। उनीहरूलाई ४ समूहमा विभाजन गरिनेछ भने प्रत्येक समूहमा ८ जना रहनेछन्। चार समूहको नेतृत्व चार क्याप्टेनले गर्नेछन्। इच्छुक प्रतिभाले डिजिटल अडिसनमार्फत पनि सहभागिता जनाउन सक्नेछन्।