हुम्लाको प्रश्न: समस्या सुन्ने कि समाधान गर्ने ?

हुम्लाका पाँच प्रमुख राजनीतिक दल एउटै आवाज बोकेर जिल्ला प्रशासन कार्यालय पुगे । राष्ट्रिय स्वतन्त्र पार्टी, नेपाली कांग्रेस, नेकपा एमाले, नेकपा र राष्ट्रिय प्रजातन्त्र पार्टीका प्रतिनिधिले जिल्लाका वर्षौंदेखिका समस्या समाधानका लागि प्रमुख जिल्ला अधिकारीको ध्यानाकर्षण गराए ।

कर्णाली करिडोरको दयनीय अवस्था, चीनबाट अवैध मदिरा भित्र्याउने समस्या, जुवातास नियन्त्रण, कैलाश मानसरोवर दर्शन गर्न जाने प्रक्रिया, हुम्लाको बेली ब्रिज मुगु लैजाने विषय, हुम्ला र बाजुरा जिल्लाको (रानीसैना) रानी खर्क सीमाको मुद्दा र सीमा पासलगायतका विषय नयाँ होइनन् । यी समस्या आज पहिलोपटक उठेका पनि होइनन् । फरक यत्ति हो– समस्या उही छन्, ज्ञापनपत्र बुझाउने हात फरक छन् र प्रशासनिक नेतृत्वका अनुहार भने फेरिइरहेका छन् । तर नागरिकको अवस्था भने उस्तै छ । यहीँबाट एउटा असहज प्रश्न उठ्छ– हुम्लामा सरकार फेरिन्छ, प्रशासनिक नेतृत्व फेरिन्छ, राजनीतिक नेतृत्व फेरिन्छ तर समस्या किन फेरिँदैन ?